“Kahit halikan ko ang dumi ng sapatos mo ngayon, gagawin ko. Kahit ano’ng gusto mo, gagawin ko. Patutunayan ko sa iyo na totoo ang dahilan ng pagpapakasal ko sa iyo.”

Hindi inaasahan ni Julianne na sa kanya ipapamana ni Mildred Sunico ang lahat ng kayamanan nito dahil hindi naman siya kadugo ng matanda. Pero hindi ganoon kadali ang magiging pagsasalin sa kanya ng kayamanan nito. Kailangan muna niyang sumunod sa kondisyon ni Mildred: ang makahanap siya ng mapapangasawa sa loob ng anim na buwan.
Tamang-tama namang nag-alok ng kasal si Tim Pozzorubio. Parang dobleng suwerte iyon sa buhay ni Julianne. Matutupad na rin ang pangarap niyang maging bride at may mamanahin pa siya.
Pero paano kung matuklasan niyang si Tim ay konektado sa isang taong malaki ang interes sa kayamanang mamanahin niya?