Walang balak si Alyanna na maging Ghost Whisperer, kahit pa ayon sa isang tita niya, nasa lahi nila ang kakayahang makakita ng multo. Pero isang araw, nagsimula na lang siyang makakita ng kung ano-ano—or rather, ng kung sino-sino—na halatang hindi na bahagi ng mundo ng mga buhay.
Napa-attend tuloy siya sa isang seminar para malaman kung paano isasara ang kanyang third eye na nabuksan na lang basta. Doon ay nakilala niya ang pinaka-hot na yatang lalaki na kanyang nakita: si Vaughn.
May malaking problema nga lang. Ang lalaki pala ay isang… ligaw na kaluluwa!
Oo, isang multo! May mas wi-weird pa ba roon? Akala ni Alyanna, wala. Pero meron!
Nalaman niyang hindi pala totoong multo si Vaughn. Ang physical body nito ay nakaratay sa isang ospital, at unti-unting pinapatay ng isang babaeng naghihiganti rito.
Sobrang gulo man ng lahat, kailangan ni Alyanna na iligtas si Vaughn. Kung hindi ay magiging huli na ang lahat para sa lalaki at sa kanilang pagmamahalan…