“Please huwag kang pumunta sa lugar kung saan hindi na kita masusundan.”

Dianne was a widow–a virgin widow to be exact. Mula nang mamatay sa aksidente ang asawa niyang si Arnold, ipinangako niya sa sariling hindi na uli magpapatali sa isang relasyon na wala siyang mapapala kundi sakit, paghihirap, at kalungkutan.
Pero isang malaking pagbabago ang nangyari sa buhay niya nang muling makatagpo si Nico Santiago, isang taon mula nang mamatay ang kanyang asawa. Si Nico ay isa sa malalapit na kaibigan nila ni Arnold. Silang tatlo ang madalas na magkakasama noon.
Hindi maintindihan ni Dianne kung bakit nag-iba ang pagtrato at pagtingin ni Nico sa kanya. Pero lalong hindi niya maintindihan ang sayang nararamdaman kapag kasama si Nico. At maging ang pagpapatangay niya sa bawat halik at haplos nito. Hindi iyon tama. Siguradong pag-uusapan siya ng mga tao kung sakaling patuloy siyang makikitang may kasamang ibang lalaki. Pero gusto na niyang sumaya. Wala na siyang pakialam sa sasabihin ng mga tao sa mundong ginagalawan nila, pati na sa maimpluwensiyang ama ni Arnold.
Pero laking gulat niya nang biglang dumating si Arnold. Buhay pala ito.
Gulong-gulo si Dianne. Mahal niya si Nico. Ito ang kaligayahan niya. Pero asawa pa siya ni Arnold…