Itinuring ni Santa na isang biyaya ang pagdating ni Miss Ava sa kanyang buhay. Bukod sa ubod ng ganda ang mukha nito ay ubod pa ng ganda ang hangarin sa mga kabarangay niya. Nilapitan siya ni Miss Ava at sinabing tutulungan siya.
Kung kailan nawalan na siya ng pag-asang tutuparin ni Miss Ava ang usapan nila ay saka dumating si Rudy Buena sa kanyang bahay. Ito ang sugo ni Miss Ava. Ito ang tutulong sa kanya upang maging isang mahusay na singer—ang pangarap ni Santa.
Ngunit kung ano ang ikinabuti ng kalooban ni Miss Ava ay siya namang ikinasama ng budhi ni Rudy. Pagkatapos ng “audition” niya sa lalaki, ang sinabi nito sa kanya ay, “Kung itinatanong mo kung pasado ka sa akin, ang sagot… hindi. Kumbaga sa eskuwelahan, ni hindi ka umabot sa pasang-awa.”
Guwapo pa naman sana itong si Rudy Buena pero ang sama talaga ng ugali!