Para kay Cindy, masuwerte ang babaeng magugustuhan ni RJ, ang best friend niya. Enrique Iglesias look-alike, matalino, mabait, magalang, at cool kasi ang dating ng binata. Napatunayan pa niya na totoong kaibigan si RJ nang hindi siya nito iniwan sa pagdating ng isang napakalaking problema sa kanyang pamilya. Naging supportive din ito sa pagsikat niya bilang DJ ng sariling lighting and sound system company at product endorser ng Sweet Booster energy drink.
Aminado si Cindy na hindi rin siya immune sa malakas na charm ni RJ. In fact, matagal na siyang secretly in love sa binata. Pero pilit na pinigilan niya ang lumalalim na pagtingin dahil baka masira ang pagkakaibigan na matagal na nilang inalagaan, lalo na at hindi rin naman siya sigurado sa feelings ni RJ. Pero mahirap palang kalaban ang sariling damdamin lalo na kung totoo ang nararamdaman. Iyon ang napatunayan ni Cindy. Kaya dumating ang araw na naglakas-loob siya na magtapat sa binata.
Pero huli na yata ang lahat. Dahil nang araw na pinuntahan ni Cindy si RJ sa bahay nito ay saka naman niya nakilala si Lucy, ang mala-Scarlett Johansson sa kagandahan na fiancee raw ng binata.