Dahil sa hiya, kontento na si Apple na maging lihim ang pagtingin kay Castiel, ang kaklase at basketball varsity heartthrob. Ni ang kausapin ang binata ay hindi niya ginawa kahit seatmate pa niya ito. Pero isang araw, nagkaroon ng chance na magkalapit sila ni Castiel. Na-realize ni Apple na hindi lang pala basta guwapo ang binata—mabait, humble, at mapagmahal pa sa pamilya. Supportive din si Castiel sa pangarap ni Apple na maging motocross racer champion balang-araw. And it was a dream come true for her na sa paglipas ng mga araw, naramdaman niya na nagiging special na siya sa puso ng binata. Pero dahil mga bata pa sila, nangako si Castiel na maghihintay hanggang sa maging ready na siya sa pakikipagrelasyon. Lalo na nang pumunta si Apple sa States para doon magpatuloy ng pag-aaral kasama ang ama na tutol sa kanilang ugnayan.

Pinanghawakan ni Apple ang mga pangako ni Castiel habang nasa ibang bansa. Pero lumipas ang maraming taon ng paghihintay, hindi tinupad ng binata ang mga pangako. Kaya sa labis na sama ng loob ay pilit niyang kinalimutan ang nararamdaman kay Castiel at itinuon ang sarili sa pag-abot sa kanyang pangarap.

One fateful night makalipas ang ilang taon, muli silang nagkita. Pero ang hindi maintindihan ni Apple, bakit sa halip na magpaliwanag at magsisi si Castiel sa naging kasalanan, parang ito pa ang may malalim na galit sa kanya?