Nanganib ang buhay ni Violet nang maging endorser siya ng Sweet Booster energy drink at mapanood ng mga taong humahabol sa kanya ang TV ad. Sa pagtakas ay nakilala niya si Cenon—ang guwapong doktor na nagligtas sa kanya sa kapahamakan. Hindi nagdalawang-isip ang binata na tulungan siya hanggang sa naging maayos ang lahat. At dahil sa kabutihan ni Cenon, agad na nahulog ang kanyang loob sa binata. Pero pagkatapos na tulungan ay bigla siya nitong iniwasan.
Naging pursigido si Violet na mapalapit kay Cenon. Hanggang sa malaman niya na naging loyal pala ang binata sa namatay na fiancee. At halos tumira na ito sa pag-aaring sementeryo kung saan inilibing ang dating nobya.
Pero handa na raw si Cenon na magsimula ng panibagong buhay at siya ang gusto nitong makasama sa pagbabago. Agad na pumayag si Violet dahil mahal na niya si Cenon. Maayos ang lahat, hanggang sa matuklasan niyang hindi pala siya dapat nagtiwala sa damdamin ng binata sa kanya.
Dahil sa huli, natuklasan niya na mahal pa rin ni Cenon ang namatay na nobya.