Isang magaling na hinete ng Santa Ana Race Track si Cherry. Kaya bukod sa na-feature sa isang TV show tungkol sa magagaling na babae at kilala sa male-dominated fields ay kinuha rin siyang endorser ng sikat na produktong Sweet Booster energy drink.
Pero kahit maganda si Cherry ay astig, magaslaw kumilos, at one of the boys ang dating niya. At para sa kanya, hindi siya pang-girlfriend material. Kaya nang makilala at ma-attract siya kay Elixir—ang anak ng matandang naging kaibigan sa karerahan, hindi siya makapaniwala na bibigyan siya ng lalaki ng kakaibang atensiyon at liligawan. Ipinaramdam din nito sa kanya na siya ang pinakamagandang babae sa buong mundo sa mga ginagawang panunuyo at pagiging supportive nito.
Sa ginagawang pagpapakilig sa kanya ni Elixir to the nth power, unti-unti ay nahulog ang loob ni Cherry sa binata. At sa kauna-unahang pagkakataon ay ipinasya niyang magtiwala at ibigay nang buo ang puso rito. Pero nalaman niya ang tunay na motibo sa panliligaw ng binata. Gusto lang pala siya nitong ilayo sa ama na inakalang inaakit at pineperahan lang niya.