Nakipag-break kay Digna ang boyfriend niya dahil ayon dito ay hindi naman talaga nila mahal ang isa’t isa sa tunay na kahulugan niyon. Hindi niya maintindihan ang ibig nitong sabihin. Ang alam niya ay mahal niya ito.
Hanggang makuha ng boss niya na si Exie ang atensiyon niya. Bumibilis ang pintig ng puso niya tuwing tinititigan siya nito. Daig pa niya ang nadaiti sa live wire kapag nagkakadaiti ang mga balat nila. Para ding ginamitan ng Mighty Bond ang mga mata niya na tila forever na niyang gustong mapagkit ang kanyang tingin sa guwapong mukha nito. Mga bagay iyon na kailanman ay hindi niya naramdaman sa ex-boyfriend niya. Right there and then, naintindihan niya ang nais ipunto ng kanyang dating nobyo.
Marahil, ngayon pa nga lang siya nagmamahal—kay Exie. Pero mabibigo pa yata ang kanyang puso na nagmamahal sa unang pagkakataon. Dahil may ibang babae sa buhay nito.