Gusto lang gumanti ni Amber kay Evan, ang boyfriend niyang manloloko, kaya naisipan niyang gasgasan ang kotse nito gamit ang tansan. Sa malas, hindi pala kotse ng hinayupak ang nagasgasan niya.
Nagbanta si Liam, ang may-ari ng kotse, na isusumbong siya sa guidance counselor. Hindi iyon puwedeng mangyari. Lagi nang laman si Amber ng guidance office. Isa pang reklamo sa kanya, tiyak expulsion na ang kababagsakan niya. Hindi siya makaka-graduate.
Napilitan tuloy si Amber na maging slave ng pinakamahanging lalaki na nakilala niya. Elise na lang ang kulang at papasa nang bentilador si Liam sa lakas ng hangin sa katawan. Kaya habang nagsisilbi siya sa lalaki ay palagi silang nagbabangayan.
Hanggang isang gabi ay bigla na lang nagkuwento si Liam tungkol sa buhay nito. Unti-unti ay nakita ni Amber ang totoong katauhan ni Liam. Mula sa pagiging isang masamang damo ay naging hero ang tingin niya sa lalaki. Pero hindi lang iyon ang nagbago. Dahil nang lubusan niyang makilala ang tunay na pagkatao ni Liam, bigla ring nagbago ang nararamdaman niya para dito.
Ramdam ni Amber na malapit nang maging sila ng binata, hanggang sa may matuklasan siya. Katulad ng kanyang ex ay pinaglalaruan lang din siya ni Liam...