Shotgun wedding. Iyon ang alam ni Arjen na nangyari sa kanya nang maikasal sa kababatang si Christianne. Ginawa niya ang lahat para pasakitan ang asawa. Palagi siyang nakasinghal tuwing kakausapin ito. At kung dati, "senorita" ang turing niya sa babaeng nagmamay-ari ng Hacienda Aurora, ngayon ay isa nang alila. Hanggang sa tuluyang sumuko si Christianne, nag-file ng annulment, at nagpakalayo-layo. Pero nasa huli ang pagsisisi. Dahil nang hindi na makita ni Arjen ang asawa ay hinanap-hanap naman niya. Noon niya na-realize na mahal pala niya si Christianne. Nakiayon naman sa kanya ang tadhana nang muling magkrus ang mga landas nila ng dating asawa pagkalipas ng pitong taon. Ibang-iba na si Christianne sa babaeng pinakasalan niya. Pero sigurado si Arjen na ito pa rin ang babaeng itinitibok ng kanyang puso. Kaya handa siyang gawin ang lahat mapabalik lamang si Christianne, sa kanyang tahanan, sa kanyang mga bisig. Kahit pa halos sipain siya nito palabas ng bahay nang magsimula siyang manligaw.