Bata pa lang si Hazel ay kontrabida na sa buhay niya si Bryce. Sinira nito ang kanyang pink dragon stuffed toy. Hanggang sa lumaki sila ay wala nang ibang ginawa ang lalaki kundi asarin siya.

Sa kagustuhang makaganti, pinagdiskitahan ni Hazel na gawing kontrabida si Bryce sa isinusulat niyang nobela. Doon, parurusahan niya ito sa ending at puputulan ng dalawang paa. Pero hindi pala iyon ganoon kadaling gawin. Kailangan niyang kilalanin ang binata para mabigyan ng maayos na characterization ang kontrabidang hinango niya mula rito.

Dahil doon, nagkaroon siya ng pagkakataong makasama si Bryce, makausap ito nang maayos at makilala ang totoong pagkatao. Hanggang sa bigla na lang, natagpuan ni Hazel ang sarili na namamangha, humahanga at napa-fascinate kay Bryce. Pambihira. Diyata't nagkakagusto siya sa walanghiyang kababata.