Kung trabaho ang pag-uusapan, walang tatalo kay Heidi. Gasoline girl, bartender, at online tutor. Ang kapatid niya na nasa ospital ang natitira na lang sa kanya kaya gagawin niya ang lahat mabuhay lang ito.
Hanggang isang araw ay nakuha ng isang advertisement ang atensiyon ni Heidi. Hiring ng bodyguard para sa Zeltics Security Agency at malaki ang sweldo. Pero ganoon na lang ang pagkagulat niya nang malamang makakasama niya sa training si Jet, ang estrangherong kumuha ng first kiss niya. Guwapo si Jet, pero ang puso nito ay daig pa ang bato sa tigas.
Lalong na-curious si Heidi sa pagkatao ni Jet nang makita ang hindi matatawarang galing nito sa pakikipaglaban. Sinabi ni Jet na mas mainam na wala siyang alam tungkol dito, pero makulit ang kanyang puso na kilalanin ang binata. They became closer without them noticing it. Until they had their second kiss...
Nang malaman ni Heidi na matira ang matibay ang labanan sa training camp ng Zeltics ay natakot siya. Ayaw niyang mapahamak sila ni Jet at ayaw na niyang mawalan pa ng mahal sa buhay, pero ang kaligtasan lang niya ang nais masiguro ni Jet dahil may ibang misyon daw ito sa Zeltics...