Never pang nagka-boyfriend si Cherry. Ni hindi pa niya nararanasan ang first kiss. Or at least, wala siyang matandaan na may lalaking nakahalik sa kanya. Dahil kung ang pagbabatayan ay ang estado niya ngayon—nagdudumilat sa kanya ang dalawang pink na linya!—malamang ay higit pa sa paghalik ang ginawa sa kanya ng lalaking dahilan kung bakit nagkalaman ang kanyang tiyan!

Si Bullet lang ang puwedeng salarin, kapatid ng isa sa mga kaibigan ni Cherry. Ang lalaki lang naman ang nagisnan ni Cherry na katabi niya sa kama—hubad-baro, naka-boxers lang at nakayakap sa kanya—kinaumagahan pagkatapos ng pajama party nilang magkakaibigan.

Hindi papayag si Cherry na hindi siya panagutan ni Bullet. Hindi niya kayang harapin na mag-isa ang sitwasyon. At sa kanyang pagkasorpresa, pumayag si Bullet sa lahat ng kanyang demands—pati na ang magpakilalang boyfriend niya sa kanyang pamilya at mga kaibigan.
Bakit kaya?