Sabihin mo lang… kung kailangan mo ang mga yakap ko ay ibibigay ko sa iyo ang lahat ng yakap na kaya kong ibigay sa buong buhay ko.

Habang nasa kasagsagan ng paghahanap ng bagong trabaho ay nasagip ni Paula ang isang matandang babae mula sa isang snatcher. Sa sobrang tuwa ng matanda ay inalok siya nito ng pabuya. Pero imbes na pera ay trabaho ang hiningi ni Paula bilang kapalit—na lalong ikinatuwa ng matanda. Inalok agad siya nito ng trabaho at ibinigay ang kalahati ng kanyang suweldo kahit hindi pa siya nakakapagsimula.
Ang trabaho ni Paula? Alagaan ang apo ng matanda na nagpapagaling sa Baguio sa naging pinsala nito sa isang binti. Masaya na sana siya dahil madali lang naman ang magiging trabaho niya. Kung hindi lang kasimbugnutin ni Karlo Maranan ang aalagaan niya. Tila lagi itong sinasapian ng espiritu ng kasungitan.
Pero pinagtiyagaan ni Paula ang binata dahil sa utang-na-loob niya sa lola nito, at dahil din sa nakikita niyang tila may kung anong malalim na pinaghuhugutan ang kasungitan nito.
Hindi siya nagkamali.
Isang araw ay humingi ng pabor sa kanya si Karlo. Samahan daw niya ito na dalawin ang fiancée nito sa Maynila.
Say wut?!
Oo. Ganoon ang reaksyon ng puso ni Paula. Dahil sa kabila ng kasungitan ni Karlo, hindi pa rin niya napigilan na mahulog ang loob sa binata.