Parang anak na ni Kara si Leslie dahil baby pa lang ang pamangkin ay sa kanya na ito iniwan ng kanyang kapatid. Ngayon ay dalagita na si Leslie. At mukhang sa unang pagkakataon ay tumibok ang murang puso nito.

Kabado man si Kara sa pagpasok ng pamangkin sa phase na iyon ng buhay nito ay wala siyang balak na maging terror tita. Imbes ay bubusugin niya si Leslie ng pangaral at paggabay. Iyon ang pasya niya, hanggang sa makilala ang binatilyong napupusuan nito. And suddenly she went berserk. Ang ama kasi ng bagets ay walang iba kundi si Monty, ang lalaking minsan nang dumurog sa kanyang puso.

Martial Law bigla ang naging patakaran ni Kara. With disastrous results. Kaya abot-langit man ang pagtutol ng kanyang kalooban ay napilitan siyang pumayag sa suhestiyon ni Monty na mag-cooperate sila sa isa't isa para sa kapakanan ng mga bagets.

Pero puso ni Kara ang walang kooperasyon. Dahil habang nagkakalapit uli sila ni Monty ay napapalapit din ang damdamin niya sa peligro. At sa ikalawang pagkakataon ay mauulit yata ang masaklap niyang sinapit.